يطيب لي
رقص أناملي فوق مسبحتي
وأنا
أضاجع النهد الكئود
يطيب لي
حين أقبلها
أن أولي وجهي شطر القبلة
يطيب لي
ارتحال روحي
في فضاءات العدم
لتعود لي
شوقا وبالأحزان حبلى
وحين أجهضها
تنزف براءتي الحمراء
طهارتي العرجاء
طفولتي الجريئة
يطيب لي
همس الخطيئة
رغم الندم
وألف " لا "
رددتها
وألف " لن "
يطيب لي
النظر في مراة ذاتي
أنا الممزق المشطور نصفين
نصف على باب بيت للبغاء
ونصف ببابك
يطيب لي
ألا يكون توحدي
من ضمة وداع
وأحضان الراحلين
الى غد مسافر
نحو التيه
في رحلة بحث
عن وطن بلا خطيئة
- ها حد عنده تعليق على العمل ؟
- ليك ولا للأرض ؟
- ماعجبنيش كريم خالص
- لكن اكيد منة شلبي عجبتك ؟
- ايوه اتفضل
- القصيدة عجبتني جداا وبشكر استاذ سيف عليها
- دش
- واحد نسكافيه لو سمحت
- حد تاني عاوز يعلق ؟ ايوه اتفضلي يا مدام سيراميك
- انا بصراحة ضايقني العمل جداا وفيه كلمة بالذات نفسي تتحذف
- الفيلم اللي فات كان .. استنى استنى .. ممكن نعرف ايه الكلمة اللي تقصدها الاستاذة ؟
- واضح انه فيه خلاف عليها بدليل ان الاستاذ ماحسش انها مضايقاه لانه حتى مش فاكرها
- هي تقصد كلمة نهد اللي في القصيدة
- والله هي القصيدة كانت كده ؟
- مش كنت تقول كنا ركزنا
- اتفضل يا استاذ فارس
- ينظر حوله بتشكك : أنا ؟
- ايوه انت مش رافع ايدك ؟
- طيب .. انا مش عارف بحس ان فيه ناس بتتعمد الموضوع ده يعني تدخل محل كشري فتلاقي الراجل مغرقه شطة وكل بقه يا معلم .. هو فاكر انه كده هايعجبنا .. انا بجد مستاء جداا من الالفاظ دي وانا مش بحب الشطة خالص
- بمناسبة بس موضوع الشطة والدقة انا مرة رحت عند ابو عماد وكان معايا كتاب للعوا فالراجل – يضحك – جاهل طبعا بيقوللي مين العوا دي مرات العو – يضحك – حصلنا الرعب – يسكت – طب حد عنده تعليق تاني على العمل ؟
- انا متفق تماما مع مدام سيراميك ان الكلمة مش مناسبة ومش موظفة وكان ببساطة يمكن الاستعاضة عنها لو حب يعني يقول مثلا صدرها بدل نهدها وتبقى اخف .. يبقى ان اقول ان العمل كتوتال سوري اقصد اجمالا ماعجبنيش وشكرا
- كش
- طيب ما حدش عنده تعليق فيه فاصل بس قبل مااقراه كنت عاوز اقولكم اني مرة كنت في بيتنا ماسك كتاب وحبيت ادخل الحمام حد فيكم يا جماعة جرب يقرا في الحمام ؟ أنا بعملها !! المهم مسكت كتاب الف ليلة وليلة من على الحوض عشان اكمله فصعقت لما لقيت ليلة ناقصة من الكتاب لآ ومقطوعة
- دبش
- شفتك امبارح ع الماسنجر وطنشتني ماشي ؟
- اهلا اتاخرت ليه ؟
- بصرة
- الو ايوه انت فين دلوقت ؟
- طيب ننتقل لعمل فارس اتفضل
- انا المرة اللي فاتت سمعتكم العمل الرائع الفسوخة والمرة الجاية هاسمعكم عملي العبقري الفلتة جواز عتريس من فؤادة عرفي انتظروه النهارده عملي المدهش بعنوان بهانة في درب التبانة .. – ينتظر حتى يجلس احد القادمين – المكان خرابة صغيرة بمجرة درب التبانة .. الزمان 25 ابريل سنة 3526 الساعة 3 واتنين وخمسين دقيقة بتوقيت كفر البطيخ – يسعل أحدهم فيتوقف زافرا بغيظ - المهم كنا بنقول ايه ؟ اه .. تقوم من نومها مفزوعة تستعيذ منه و .. – يتوقف على اثر سارينة سيارة شرطة مارة في الشارع– تستعيذ منه تحاول النهوض فتكتشف انها مقيدة في السرير و
-زززززززززز
- لأ دي مؤامرة بقه اخلص م البشر يطلعلي الناموس .. هششش
- كمل يا فارس
- تصرخ فتسمع وقع خطوات تقترب – تاتي سيارة رش الجاز ويختفي كل شيء - مؤامرة وانا عارف مين اللي مدبرها برضه مش هاكتب زي مانتوا عاوزين !
- مش كنت متضايق من الناموس اشرب بقه – نوبة سعال للجميع –
كمل كمل
- تصرخ فتسمع وقع خطوات تقترب
- الله اكبر الله اكبر
- استغفر الله العظيم
- كمل بس ياريت تعدي الحتة النحس دي
- تتصاعد انفاسها ويكاد ينخلع قلبها تصرخ مع ظهوره وقد تجمدت من الرعب
- ايه يا عم جو الرعب ده
- يقترب منها يقترب اكثر فتتبين ملامحه المخيفة يطل من عيناه شررر الشر وترى اللهيب ينبعث من اذناه الطويلتين وقد احمر انفه كخفاش مصاب بأنفلونزا الطيور – يكرر – وقد احمر انفه كخفاش مصاب بأنفلونزا الطيور
لا يجد استجابة فيكرر بانفعال – بقول كخفاش خفاش مصاب بأنفلونزا الطيور .. ماضحكتوش ليه ؟ - يقوم مشوحا بعصبية – جهلة الحتة دي فيها سخرية الخفاش حيوان مش طائر يا جهلة .. أغبيا كلكم اغبيا – بلهجة مسرحية – كلكم كلكم
- كمل يا استاذ من غير تجاوز لو سمحت
- أنا مش شايفه انه تجاوز الصراحة مش عاوزين نتحامل عليه حرام
- طب كمل
- يقترب اكثر واكثر يعريها من ملابسها
- استنى القصة باين عليها حلوة
- يتأمل قدمها الجميلة وساقها الناعمة وركبتها الرائعة و.. – يكمل وصف الجسد والبعض مطأطئ والبعض في منتهى التركيز – ويعاشرها عشر مرات و
- تعليقات على العمل ايوه اتفضلي يا مدام سيراميك
- تحفة العمل تحفة الله عليك يا فارس بجد موهبتك مرعبة ربنا يباركلك فيها
- اتفضل
- انا شايف العمل جريء شوية ومتجاوز حبتين وكنت بصراحة خجلان وانا باسمع
- ايوه
- انا شايفه ان الجنس في العمل موظف جداا وكان في مكانه مش عاوزين نتحامل ونتشنج نبص بصة موضوعية شوية انا العمل عجبني وشكرا
- العمل عجبك بجد ؟
- أصله بيصعب عليا والله !
- اتفضل
- انا شايف ان الكاتب متأثر باحمد خالد توفيق
- حضرتك بتقول مين ؟ احمد خالد توفيق .. طويل العمر يطول عمره ويكتر كتبه وينصره على مين يعاديه
تقوم مجموعة من الحاضرين حاملين للدفوف ويلفون حول الكراسي مرددين : مدااااااد ش الله يا سيدي احمد يا خالد يا توفيق مداااااد حي
- ربنا يجعلنا من بركاته
- هو فيه ايه مين دول ؟
- دول اتباع الطريقة الخالدية التوفيقية في الكتابة
- طب نسمع الاستاذ ساكت
- انا ؟ - يفتح فمه مزيلا خيوط العنكبوت من بين شفتيه – انا شايف فعلا ان الاستاذ فارس بيتطور بسرعة يعني المرة اللي فاتت سمعنا عمله الرائع النهارده عمله المدهش لأ والمرة الجايه هايسمعنا عمله الفلتة منتهى التطور
- حد عنده تعليق تاني ؟ مفيش طب فيه اعلانات ؟
- اه فيه ندوة ف مركز شباب الحبانية وهاقول فيها ان شاء الله ياريت تحضروا
وفيه ندوة في كلية الطب البيطري عن علم الجمال !!
- طيب نختتم الندوة عشان الأمن بيشاور
حساب النسكافيه لو سمحت
كش مات
ط
هناك ٥ تعليقات:
انا ماعنديش تعليق
لسبب بسيط جدا
انا مافهمتش اى حاجة
لامؤاخذة يا طرّوق
ماتعملش حسابي فى التدوينة دى
بالظبط اللي كنت داخلة أقوله، أوضحه سقراط في موقفه من هذه التدوينة يا باشمهندس
حلوة قوي انت بينت حال استقبال المثقفين او اشباه المثقفين للعمل الأدبي
والناس اللي كل واحد فيهم بيفكر في حاجة غير قصد القصة من الأصل
دمت بكل الخير يا جميل
متفهم جدا موقفك يا سقراط
وعذرك تماما وتتعوض في تدوينة تانية ان شاء الله
لكن " بحلم " انتي عارفه الفولة وعارفه العمل ده كويس فمش فاهم موقفك..
الحقيقة كنت حابب أعرف رد فعل الناس الغرب - بضم الغين - على أعمال كتبت لظرف محدد وعن ثلة معينة
ط
مصطفى باشا
منور على رأي المدونين
سعدت برأيك والحمد لله انها عجبتك
اهلا بيك صديق جديد للبرنامج
ط
إرسال تعليق