تجديد الخطاب الديني

1

يختتم المؤذن إقامة الصلاة، بثبات يتقدم الإمام مستقبلا القبلة وقبل أن يشرع في الصلاة يلتفت إلى المصلين من خلفه مذكرا : استقيموا يرحمكم الله، الأخوة المصلون من يحمل منكم موبيلا فليغلقه، أو على الأقل فليجعله على الوضع سايلنت.. خاصة اذا كان من النوع إن 70 أو الأنواع الصيني الجديدة حيث أن صوتها مرتفع للغاية...

الله أكبر...

...

2

- هي الساعة كام دلوقت؟

- عشرة ونص

- طب معلش يا جماعة ، أنا في الخليعة

- ليه يابن الخليعة؟

- بتقول ايه؟

- بقول ليه يابني الخليعة دلوقت

- حلقة عمرو خالد هتبدأ دلوقت

- طب كمل الحجر والعشرة

- لأ كملوا انتوا وحاسبولي سلام

- هو من امتى طلعله الإيمان ده؟

- من يوم ما شافها

- هي ايه الحلقة؟

- لأ يا مغفل هي

- هي مين؟

- هي اللي مدوخاه ومش عارف يوصلها

- ايه يابني الحكاية؟

- ده دايخ وراها قبل الفطارلابد ع النت على موقع عمرو خالد وصناع الحياة وبدأ يشترك في الأنشطة بتاعتهم

- ليه كل ده الواد ده اتكهرب ولا ايه؟

- لا كل ده عشان عنده أمل يشوفها أو يلاقي الايميل بتاعها

- هي مين دي؟

- البنت اللي بيشوفها بتحضر حلقات عمرو خالد في التليفزيون

- للدرجة دي؟

- من يوم ماشافها وهي مخيشة في نافوخه مفوتش حلقة من يومها

- الواد ده غبي هو مايعرفش ان عمرو بيذيع من بره مصر

- بيني وبينك البت مزة وتستاهل

- استغفر يابني احنا في رمضان

- استغفر الله العظيم

- يا شعبااااان تعال غير الحجر.

...

3

- يجوز يجوز إن شاء الله

يدخل المأذون وأهل العروس وأخوات العريس الحجرة ويشغل أخو العروسة جهاز الكمبيوتر

يفتح المأذون دفتره ويبدأ في التسجيل : فين بطاقة العريس؟

تقدمها اخته: الرقم القومي اهه بعته بالدي اتش ال ودي الصور

- فين والد العروسة وفين المنديل

- أيوه يا سيدنا .. اتفضل

- اقعد هنا

- حاضر

- ماما ماما عايز ألعب فيفا

- اسكت يا واد

يظهر على الجانب الآخر العريس مبتسما ببدلته السوداء مشيرا باي باي محركا شفتيه

- فين الصوت يا عمرو

يفصل أخو العروسة سماعات الأذن ويشغل الساب ووفر

- ششششش عاوزين نسمعه

- أيوه يا عمي القايمة انا مضيت عليها وبعتها وصلتك؟

- أيوه يابني وصلت

- وصلت ولا لآ؟

- خد يا بابا المايك

- أيوه يابني وصلت

- الحمد لله بعد اذنك ياعمي اول ما القسيمة تطلع ابعتهالي عشان اعمل اجراءات الاستقدام

- حاضر يابني

- ماما ماما عايز ألعب فيفا

- اسكت يا واد

المأذون يتدخل: يا استاذ أيمن مش نبدأ بقه؟

- حاضر اتفضل

يطلب من الأب: افرد كفك (ويغطيها بالمنديل)

وانت من عندك افرد كفك يا استاذ ايمن

فجاة تختفي الصورة

- ايه اللي حصل

- الكمبيوتر فصل

- اتصرف بسرعة يا عمرو

- كله من الفيروسات اللي في الألعاب بتاعة حمادة باشا

- والنعمة لسه منزل ويندوز جديد وانتي فايروس

- انت عاوز تبوظ جوازة اختك يابني

- يا خوانا اتصرفوا انا عندي طلاقة مستعجلة

- ماما ماما عايز ألعب فيفا

- اسكت يا واد

- ممكن ننزل ويندوز كلها نص ساعة بس

- لا ده كتير كتير

يشغل عمرو الجهاز فيعمل

- أهه اشتغل الحمد لله

- معلش يا استاذ أيمن

- لا ولا يهمكم بتحصل

- قول ورايا

الكهرباء تقطع فجاة

- يااادي النحس

- هو فيه ايه

- عين عين والله

- أنا عارفه الجوازة دي مالها كده

- مالها ياختي النور هاييجي دلوقت وان شاء الله نخلص بقه

- نخلص ده احنا اللي عاوزين نخلص

- ماما ماما عايز ألعب فيفا

- اسكت يا واد

- هييييييه النور جه

..

يفتح أيمن الإنبوكس يفاجا برسالة من أخته " مش عارفه أقولك ايه بس لازم أتكلم .. عبير ماشية مع الواد تيتو بتاع السايبر .. مرفق ملف فيديو يأكد كلامي"

..

تفتح عبير الإنبوكس فتفاجأ برسالة من أيمن عنوانها " انتي طالق "

ط